We as a society need to change

Nirbhaya is no more. Kaun hai jimmedar in sabke liye? Hum, hamara samaj, films, surakchha vavyastha, sirf ye hi? Nahi sirf ye hi nahi ,hamara parivar, parivar se mile sanskar bhi iske liye jimedar hai.Aaj bhi hamare desh mein bete ke janm pe ladoo baate jate hai aur beti ke janm pe matami surat banai jati hai, par aage chal ke kya hota hai. Koi beta aisi galat harkat kar jata hai jis se pura khandan, pura samaj, yahan tak ki pura desh sharmsar ho jata hai. Maa ke chdhaye huye prasad , bante huye laddoon ki mithash kahan chali jati hai, bujurgon ka aashirvad kyun nahi kam aata? Kaash ki un sabke saath sanskaron ki ghhutti bhi thodi si chadha di hoti ki beta badi badi degree le lene se tu aadmi to ban jayega lekin jis ki degree tujhe kisi bhi college ya university mein nahi milegi lekin jo jivan ki sabse mahatavpurn shiksha hai who hai tere ghar ke sanskar, maa ki seekh. Kyon nahi maa ,dadi nani ne apni lorion me gaya aur gati ki har ek ladki ,har ek aurat ki ijjat karna,kyon nahi ek  pita apne ladle ko apne kandho per baitha kar ghumate huye yeh sikhte ki kabhi kuchh aisha mat karna jis se hamara sar sabke samne jhuk jaye,hamesha maryada mein rehna.Aaj bhi bahut se kasbe aise hai jahan aaj bhi ladkion ko college nahi bheja jata per dusri taraf harek parivar ye kahta hai ki hamare ghar ke ladke toh bahut sanskari  hai .Kya yeh kuchh ajib nahi lagata?Jab sab sanskari hai to phir kyon nahi ladkiya aajadi ki saans le pati. Nahi sab kuchh thik nahi hai, tabhi to na jane kitni NIRBHYA bhay ke saye main jiti hai, katni NIRBHAYA ko anhoni ka shikar banna padta hai. Aaj ki filmein bhi kam jimmedar nahi hai in sab ke liye. Kya filmi kalakar khud apni film apne parivar ke saath baith kar dekh sakte hai? Aaj hum un filmon ke naam apni ungli per gin sakte hai jinhe hum apne pure parivar ke saath baith kar dekh sakate hai , aur filme hi kyon ab to TV bhi isse bacha hua nahi hai. Kala aur manoranjan ke nam per jo kuchh bhi ho raha hai uss ko badlne ki jaroorat hai. Aur sabse jarrori hai un purushon ko apni soch badalne ki jo yeh haiwaniyat ka khel khel rahen hai kyon ki ab samaj jag chuka hai. Ab aise bhediyon ko kisi bhi kimat per maaf nahi kiya jaana chahiye. Maa apne bete ki galti per use usi waqt sambhal le, bachpan ki sikh hi use baki puri jindagi usse INSAAN banay rakhegi. TU BHI EK AURAT HAI MAA, NIRBHYA KA DARD MAHSUS KAR LE.